مھرنھاد نمیران انت 

چہ مھرنھادءِ شھادتءَ سالے پر گوست ۔ یعقوب مھرنھاد بلوچ راجءِ ھما تاسُپیں بچّ ات کہ آییءَ وتی زند پہ بلوچ و بلوچستانءَ ندر کت ۔

مھرنھادءِ میار چی ات و گناہ کجام ات ۔ آییءِ میار ایش ات کہ پہ وتی بلوچ بیگءَ پھر ای بست ۔ گناہ ، بلوچ دود و ربیدگءِ زندگ دارگ و دیما برگءِ جھد ۔ مھرنھاد ھما بلوچ ورنائیں جھدکار ات کہ ماں ایرانءِ بلوچ دشمنیں سیستمءِ تھا پہ بلوچءِ پجّار و ھستیءِ برجاہ دارگءَ جھد کت ۔ آییءِ کوشش ات کہ ماں ھما قانون و رھبندانی تھا کہ ایرانءِ اسلامی جمھوریءَ وت جوڑ کتگ انت ، بلوچ راجءِ حقانی پد جنیءَ بکنت ۔ بلے چو زانگ بیت کہ ایرانءِ وتی جوڑ کتگین و منّ اتگیں قانون ھم پہ بلوچاں نہ انت چیا کہ آ بلوچ راجءَ وتی نہ زاننت بلکیں بلوچستانءَ وتیگ کننت ؛ بلوچستانءِ مال و مڈیءَ لوٹنت ۔ ایرانءِ بلوچ دشمنیں واکدار ، ھرھما بلوچءَ وتی مستریں دشمن زاننت کہ آ چہ آھانی بلوچ چک چین کنوکیں کرداں زانتکار انت ۔

یعقوب مھرنھاد ھما جھدکار ات کہ آ چہ ایرانءِ واکدارانی بلوچ دشمنیءَ شرّیءَ سرپد بیتگ ات پمیشا ایرانءِ حکومتءَ آ ھچ دابا سگّ ات کت نہ کت ۔

ایرانءِ واکدار شرّیءَ بزاننت کہ مھرنھاد ھما وشبوئیں پلّ ات کہ چہ سندگءَ پد ھم آییءِ وشبو تالان انت و تا وھدیکہ بلوچ راج ھست ، مانیت ۔

شھید یعقوب مھرنھادءِ یاد نمیران بات

بلوچستانءِ راجی زرمبش

4 اگست 2009